कप्तानीबाट पारस खड्काले दिनुभएको राजीनामालाई कसरी लिनुभएको छ?
अलिकति अस्वाभाविक नै हो। उसको निर्णयको हामीले सम्मान गर्नैपर्छ। उसले सोचविचार गरेर नै निर्णय लिएकाे होला। तर, एकचोटि सबै बसेर पारसलाई फर्काउने कुरा गर्नुपर्छ। यो समयमा सबै जना एकजुट हुन जरुरी पनि छ। उसको लिडरसिप चाहिएको पनि छ। खाँचो पनि छ। हेरौं के हुन्छ। पारसको कप्तानीबाट राजीनामा अलि छिटो हो कि जस्तो लाग्छ।

Advertisements

पारसको राजीनामाबारे केही संकेतहरु पाउनुभएको थियो?
हामीले सधैँ खेलिराख्ने कुरा हुँदैन, हामीले पनि समय हेरेर अरुलाई पनि बाटो खोल्नुपर्छ र नेपाली क्रिकेट सेफ साइडमा गएपछि विदा लिनुपर्छ भन्ने कुरा पहिलेदेखि नै भइरहन्थ्यो। राजीनामाको विषयमा गम्भीर रुपमा त हैन, सामान्य रुपमा अब कसरी अघि बढ्ने भनेर छलफल त भएको हो। तर, अहिले नै एक्कासि उसले राजीनामा दिन्छ भन्ने मलाई लागेको थिएन।

Advertisements

तपाईंको भनाइ पनि पारसको नेतृत्व अझै केही वर्ष नेपाललाई चाहिन्छ भन्ने हो?
हो। किनभने अहिले क्यानको निलम्बन पनि फुकुवा भएको छ। नयाँ बोर्ड आएको छ। क्रिकेट नयाँ संरचनामा जाँदै गरेको बेला ऊसँग भएको अनुभवलाई लिएर सबै जना टिम भएर अबको हाम्रो बाटो कोर्न पाएको भए राम्रो हुन्थ्यो।

पारस स्वयंले अब कप्तानीमा फर्किँदैन भनिसकेपछि नयाँ कप्तानको प्रमुख दाबेदार उपकप्तानका हैसियतले तपाईं नै हो। तपाईंमाथि कप्तानीको जिम्मेवारी आएपछि त्यसलाई सम्हाल्न तयार हुनुहुन्छ?
गएको दश वर्षदेखि ऊ कप्तान हुँदा म उपकप्तान थिए। बीच-बीचमा पारसको अनुपस्थितिमा मैले कप्तानको भूमिका निभाइराखेको थिएँ। मैले कप्तानी पाउँदा नयाँ, नौलो या आत्तिनुपर्ने कुरा हुन्छ जस्तो मलाई लाग्दैन। कप्तानीका लागि म तयार भएर बस्नुपर्छ जस्तो पनि लाग्दैन। कप्तानीको कुरो मभन्दा पनि नयाँ व्यवस्थापन तथा प्रशिक्षकले निर्णय लिने कुरा हो। यदि त्यस्तो हुन्छ(कप्तानी पाइएमा) भने अहिलेसम्म गरिरहेको अनुभवले नयाँ जिम्मेवारीमा घुलमिल हुन फरक नपर्ला।

कप्तानले छाडेपछि स्वाभाविक रुपमा उपकप्तानका हैसियतले तपाईंले नेतृत्व पाउनुपर्ने हो नि, हैन?
सधैँ एउटै धारमा चल्नुपर्छ जस्तो मलाई लाग्दैन। अरुलाई चेन्ज चाहिन्छ या अरु केही गर्नुपर्छ भन्ने जस्तो टिमलाई, सबैलाई लाग्छ भने उपकप्तान नै कप्तान हुनुपर्छ भन्ने लाग्दैन।

त्यसो भए युवा खेलाडीहरुमा पनि कप्तानीको विकल्पका रुपमा हेरिएको होे?
नेतृत्व भन्नेकुरा एकैचोटि दिँदैमा, नदिँदैमा थाहा हुँदैन। कोही नयाँ आउँछ भने उहाँहरुलाई पनि समय चाहिन्छ। घरेलु प्रतियोगितामा दीपेन्द्र(ऐरी), सोमपाल(कामी)ले पनि कप्तानी गरिरहेका छन्। सबै जनाले टिमको एकता र भाव बुझेर अगाडि बढ्नुहुन्छ भन्ने मलाई लाग्छ। त्यसैले युवा खेलाडीहरु पनि कप्तानका रुपमा अघि बढ्न सक्नुहुन्छ।

कप्तानको मुख्य दाबेदार त तपाईं नै हो। तपाईंले कप्तानी पाउनुभयो भने पारस खड्काको ‘लिगेसी’लाई निरन्तरता दिने चुनौती तपाईंमा होला नि?
एकदम, एकदम। नेपाली क्रिकेटबाट सबै जनाको अपेक्षा पनि एकदमै उच्च छ। पारसले कायम गरेको लिगेसीलाई क्याच गर्न त पक्कै पनि गाह्रो हुन्छ। तर, हाम्रो मुख्य (गोल) भनेको जित्ने हुन्छ। को कप्तान हुन्छ भन्दा पनि टिमको लक्ष्य ओडीआई स्टाटस (एक दिवसीय मान्यता) कसरी कायम राख्ने र टेस्ट स्टाटसतर्फ कसरी जाने भन्ने नै हुन्छ जस्तो लाग्छ। कप्तानमात्रै नभएर सबै जना टिम भएर त्यो उद्देश्यतिर अघि बढ्नुपर्छ जस्तो लाग्छ।

तपाईं कप्तान हुँदा पारस खड्का खेलाडीको रुपमा मैदान उत्रिए उहाँबाट तपाईंको अपेक्षा के रहन्छ?
ऊसँगको अपेक्षा मलाई भनिरहनुपर्छ जस्तो लाग्दैन। उसले आफैँ कप्तान तथा खेलाडीको रुपमा बारम्बार प्रदर्शन गरिरहेको छ। टिमलाई जिताउन आफ्नो भूमिका कस्तो हुनुपर्छ भन्ने उसलाई राम्रोसँग थाहा छ। त्यसैले स्वाभाविक रुपमा नै उसको प्रदर्शनबारे उसलाई आफैँ ज्ञान हुन्छ। कसैले सम्झाइरहनुपर्छ जस्तो लाग्दैन।

नेतृत्व पाउनुभयो भने टिमलाई कहाँसम्म पुर्याउने आकांक्षा छ?
मैले नेतृत्व गरेर टिमलाई मैले पुर्याउने हैन। टिमले पुर्याउने हो। म एक जनाले लिएर गएर पुग्ने हैन। जोसुकै कप्तान होस्, यदि टिमले टिमको लक्ष्य पूरा गर्दैन भने प्लेयरले कहिले पनि अघि बढ्दैन।

तपाईको प्रतिक्रिया राख्नुहोस

कृपया तपाइको कमेन्ट लेख्नुहोस्
कृपया आफ्नो नाम लेख्नुहोस्