४ माघ, काठमाडौं । निर्वाचन आयोगले प्रदेश सभातर्फका समानुपातिक सांसदहरुको नतिजा सार्वजनिक गरेपछि अब प्रदेश सरकार गठनको संवैधानिक प्रक्रिया शुरु भएको छ । राष्ट्रियसभा निर्वाचनपछि मात्र प्रतिनिधिसभाको परिणाम सार्वजनिक हुने भएकाले संघीय सरकारको प्रधानमन्त्री चयन हुनुअघि नै प्रदेश सरकारको मुख्यमन्त्री चयन हुने देखिएको छ ।

सरकारले प्रदेश प्रमुख र मुकाम तोकेलगत्तै निर्वाचन आयोगले प्रदेशसभाको नतिजा सार्वजनिक गरेको छ । शुक्रबार निर्वाचन आयोगले उनीहरुलाई विजयी भएको प्रमाणपत्र दिनेछ ।

त्यसलगत्तै प्रदेश सभा र प्रदेश सरकार दुवैको गठन प्रक्रिया फटाफट अघि बढ्ने आयोगका प्रवक्ता नवराज ढकालले बताए ।

Advertisements

फागुन ३ अघि नै मुख्यमन्त्री चयन

संविधानअनुसार प्रदेशसभाको निर्वाचनको अन्तिम परिणाम घोषणा भएको मितिले तीस दिनभित्र मुख्यमन्त्री नियुक्त हुनुपर्छ । संविधानतः फागुन ३ गतेभित्र सातै प्रदेशका मुख्यमन्त्री नियुक्त भइसक्ने छन् । उनीहरुले त्यसको ३० दिनभित्र प्रदेशसभाबाट विश्वासको मत लिनुपर्नेछ ।

राष्ट्रियसभा निर्वाचन प्रक्रिया र त्यसपछि मात्र प्रतिनिधिसभाको समानुपातिक सिट वितरण गर्ने निर्वाचन आयोगको कार्यतालिकाका कारण मुलुकले प्रधानमन्त्री पाउन भने अझै कम्तीमा डेढ महिना कुर्नुपर्ने देखिएको छ । प्रधानमन्त्रीभन्दा पहिले मुख्यमन्त्री र प्रदेश सरकार गठन हुने भएको छ ।

त्यसैले दलहरु अब राष्ट्रियसभा निर्वाचनसँगै प्रदेश सरकारका मुख्यमन्त्री, मन्त्री, सभामुख, उपसभामुखहरु चयनमा केन्दि्रत हुनुपर्ने भएको छ । प्रदेशसभाको अन्तिम निर्वाचन परिणाम घोषणा भएको मितिले २० दिनभित्र प्रदेश प्रमुखले प्रदेशसभाको अधिवेशन आह्वान गर्नुपर्ने संवैधानिक बाध्यता छ ।

तपाईको प्रतिक्रिया राख्नुहोस

कृपया तपाइको कमेन्ट लेख्नुहोस्
कृपया आफ्नो नाम लेख्नुहोस्