दाङ । सरकारी वकिल कार्यालयको दुई तला माथिबाट हाम फालेर भागेका थुनुवा लक्ष्मण विश्वकर्मालाई प्रहरीले पुन: पक्राउ गरेको छ। विश्वकर्मा बिहिबार अपरान्ह म्याद थपका लागि लगेका बेला सरकारी वकिल कार्यालयको दुई तला माथिको शौचालयको झ्यालबाट हाम फालेर भागेका थिए । घोराही उपमहानगरपालिका वडा नम्बर १७ का २२ वर्षीय विश्वकर्मा सुन र पैसा चोरीको अभियोगमा पक्राउपरेका थिए । म्याद थप नहुँदै थुनुवा भागेका अभियुक्त विश्वकर्मालाई जिप्रका दाङबाट खटिएको प्रहरी टोलीले शुक्रबार राति घोराही१७ चौघेरामा लुकिछिपी बसेको अवस्थामा पक्राउ गरेको हो ।
